२१ साउन, जनकपुरधाम ।

जनकपुरधामबाट चाँदीका इँटा बोकेर नेपाली टोली भारतको उत्तर प्रदेश राज्यस्थित अयोध्या प्रस्थान गरेको छ । भारतीय प्रधानमन्त्री नरेन्द्र मोदीले बुधबार भारतको अयोध्यामा गर्ने भगवान श्री राम मन्दिरको भूमि पुजन (शिल्यानास) कार्यक्रममा जनकपुरधामबाट चाँदीको इँटा र जनकपुरको माटोसहित श्री जानकी मन्दिरका महन्थ त्यसतर्फ गएका हुन् ।

अयोध्या प्रस्थान गर्नुअघि महन्त दासले भगवान रामको मन्दिर शिलान्यासका लागि रामको ससुराली जनकपुरधामबाट चाँदीका ५ वटा इँटा र जनकपुरधामको माटो प्रदान गरिने बताए । एक किलो चाँदी बराबर एउटा इँटा तयार पारिएको उनले जानकारी दिए ।

जनकपुरबाट समेत माटो पठाउन अयोध्याबाट पत्र आएपछि जानकी मन्दिरका महन्थ दास माटो र ईटा लिएर अयोध्याको लागि प्रस्थान गरेका हुन् । दास नेतृत्वको टोली प्रशासनको अनुमति लिएर जटही नाकाबाट भारत प्रवेश गरेको थियो ।

भारतका प्रधानमन्त्री नरेन्द्र मोदीले नेपाली समयअनुसार बुधबार दिउँसो एक बजे अयोध्यामा भगवान रामको मन्दिर शिलान्यास गर्ने कार्यक्रम छ ।

मुस्लिम समुदायले सो जग्गा बाबरी मस्जिदको हुनुपर्ने दाबी गर्दै आएकोमा गत वर्ष कात्तिक महिनामा भारतको सर्वोच्च अदालतले जग्गा राम मन्दिरको भएको फैसला गरेको थियो ।

Leave a Reply

Your email address will not be published. Required fields are marked *